Historia del Montepío de la Minería: Un símbolu de l’Asturies obrera y solidaria
⚒️ La historia del Montepío ye la historia de solidaridá, unión y compromisu de les families mineres asturianes pa facer frente a l’adversidá de la mina y les sos traxedies.
Fonte (cita) oríxenes del mutualismu minero n`Asturies
El Boletín de Estudios de la Fundación Emilio Barbón (Nº8-2015) recoge: «…Sobre el Montepío del Carbón, en la época de la Sociedad Minera Aguado, acontece en 1840 un hecho histórico. Su apoderado, Don Luis Jante, elabora un Reglamento ¿el primero? del Montepío, y en virtud de el, cada mes se descuenta el salario de un día a todos los trabajadores, y se ingresa en un montepío de empresa que cubre el pago del médico, el del cirujano practicante y medicinas, no solo para el personal en activo, sino también para los accidentados, madres, viudas e hijos menores huérfanos; y asimismo, contemplaba una pensión a las viudas y madres de los mineros fallecidos».
Hai constancia de que funcionó hasta ochobre de 1858. El xerme de los montepíos mineros quedaría enraigonáu pa siempre nes families mineres.
Tres el gran procesu de nacionalización del carbón asturianu fechu n’España en 1967, el Montepío de la Minería Asturiana naz como Mutualidá’l 10 d’ochobre de 1970, depués de que la Seguridá Social reconociere les singularidaes propies de la profesión, cola creación del Réxime Especial de la Minería, y asumiere les prestaciones que solidariamente fueron cubriendo los trabayadores coles sos aportaciones estres: ayudes a la orfandá, viudedá, complementos de pensiones… Hasta esa fecha, los distintos montepíos de trabayadores de les decenes y decenes d’empreses mineres esistentes n’Asturies dende’l sieglu XIX yá dieren un exemplu maraviyosu del significáu y valor de la unidá de toos énte les desgracies y sinsabores d’un trabayu duru y difícil, del que’l so sacrificiu dexó una buelga imborrable en forma de secueles que tovía güei perviven como orfandaes, viudedaes, discapacidaes…
Tres décades d’actividá circunscrita al auxiliu, el nacimientu de la Seguridá Social n’España y del so réxime especial pa la minería, la meyora de les condiciones de trabayu y de salú llaboral y la llegada de la sociedá del bienestar permitieron al Montepío centrase yá como Mutualidá na diversificación de la so actividá solidaria como entidá de previsión social. Per un llau, destinando complementos nel réxime mineru a la cobertura de la Seguridá Social nos casos d’incapacidá llaboral y de baxes prestaciones, por retiraos anticipaos, accidentes, pensiones baxes… equilibrando dende la Mutualidá, con ayudes, los ingresos d’estos trabayadores mineros y de les sos families afectaes.
El Montepío desarrolló tamién una gran actividá nes comarques mineres asturianes como axente social d’información mutualista, siendo difusor d’información de la Seguridá Social gracies al históricu conveniu de collaboración que mantién col Institutu Nacional de la Seguridá Social (INSS). Y tamién, dende’l so orixe, organizando les vacaciones de salú y descansu nel Balneariu de Ledesma, o collaborando n’acciones de formación y educación pa los fíos y fíes de mineros que lo precisaben.
Compromisu social y actividá mutualista
Un principiu de compromisu social y solidariu preside, dende la so fundación, el 10 d’ochobre de 1970, el funcionamientu del Montepío de la Minería Asturiana, que tovía güei sigue espardiendo la so actividá col principiu de la participación colectiva cola denominada “cuota solidaria” de les aportaciones de les sos families mutualistes: trabayadores mineros/es, los sos fíos y fíes, nietos y nietes o familiares directos, anque anguaño puedan exercer otra profesión, y tamién de los pensionistes o viudes acoyíes al Réxime Especial de la Minería del Carbón que dieron los sos servicios n’Asturies. Esti espíritu mutualista yá esistía n’Asturies dende’l sieglu XIX, colos primeros montepíos mineros venceyaos a les distintes empreses carboneres qu’operaron na nuestra comunidá.
Dende’l so orixe, el Montepío atiende distintes necesidaes d’ayuda por continxencies comunes de la familia minera, como pensiones, subsidios, complementos de pensiones y fallecimientu, orfandá…
Balneariu de Ledesma y política social
Pero un fitu na so actividá y na diversificación de la so ufierta de servicios llegó en 1980, cuando’l Montepío empieza a xestionar el Balneario de Ledesma en Salamanca, por alcuerdu cola Seguridá Social, instalaciones que yá veníen siendo disfrutaes dende mediaos del sieglu XX por cientos de mineros asturianos nos primeros programes de prevención y salú llaboral puestos en marcha como respuesta pa tratar d’alliviar los impactos del duru trabayu mineru, inda más duru naquellos tiempos. Esta actividá de salú y sociosanitaria convertiríase nos años 80 nún de los principales servicios de la Mutualidá. En 1987, el Montepío soscribe un compromisu de compra de la histórica estación termal, na vera del Tormes, que remata na primavera de 1990 cola adquisición definitiva del Balneariu de Ledesma.
El Balneariu de Ledesma, que tien el so orixe nun antiguu emplazamientu termal de tiempos de Marco Aurelio, mantién la so actividá dende la Reconquista (Reinu Asturllionés, Baxa Edá Media), cunta dende’l Sieglu XVI con un serviciu pioneru n’hidroloxía médica, lligáu a l’actividá ilustrada de la Universidá de Salamanca. Anguaño, les sos instalaciones balnearoterapéutiques inclúin restorán, cafetería, zones deportives y verdes, piscina esterior, ilesia, farmacia o tiendes… y una programación cultural diaria. Dende 1888, el so manantial ta catalogáu como Bien d’Interés Minero-Medicinal; y dende 1931 tol conxuntu, a la vera del Tormes y la so devesa, ye Monumentu Histórico-Artísticu Nacional (categoría BIC, Baños romanos). En 1989, les sos instalaciones residenciales fueron renovaes por completu. Tien capacidá pa 634 persones nel so hotel, con 280 cuartos y categoría de trés estrelles. Amás, dientro de la villa termal esisten apartamentos pa quien desee otra fórmula d’agospiu.
Nel so afán por desarrollar una política social nueva, el Montepío de la Minería promovió tamién, a finales de los años 80 y principios de los 90, 400 viviendes de promoción nes comarques mineres, ayudando a les families y tratando de fixar población nunes zones que yá taben sufriendo lo duro de les reconversiones industriales y el piesllu de les mines.
Destinos de sol y salú
Tamién na década de los 90 y énte la demanda de les families mutualistes d’ameyorar l’atención de salú y bienestar hacia vacaciones de talasoterapia, barros, sol, y siendo siempre la prevención de la salú familiar un referente pa los mineros, medraría la ufierta vacacional col desarrollu de les primeres fases d’apartamentos vacacionales, primero -1990- nel Mar Menor (na zona de Los Narejos en Los Alcázares de Murcia- Destinos de Sol – La Minería Apartments (Los Alcázares) y más tarde (2003) Roquetas de Mar (Costa d’Almería Destinos de Sol – La Minería Apartments (Roquetas).
Son bien conocíes les propiedaes curatives del Mar Menor como llaguna salada, con baños y barros que yá s’usaben na dómina árabe de la Península (Al-Kasar ye’l topónimu orixinal de Los Alcázares) con principios asomeyaos a los del Mar Muertu: la so alta salinidá. Dende entós, esti ye ún de los destinos de sol y salú más estimaos polos nuestros mutualistes, dando pie a una rellación d’hermandá bien fuerte ente Asturies y esti conceyu de Murcia, que tien a la llocomotora minera Marqués de Bolarque, na rotonda de recepción del nuestru residencial, como ún de los sos fitos nos percorríos turístico-culturales. Más tarde, en 2003, llegaría la compra del apartahotel na Costa d’Almería, en Roquetas Urbanización, ufiertando dende entós 125 apartamentos vacacionales con servicios distintos.
Hai que recordar tamién que, nel marcu de la previsión social, nos años 90 el Montepío pon en marcha un plan de pensiones y otru pa xubilaos, a los que s’apunten más del 80 % de los sos mutualistes pola so gran utilidá como elementu d’aforru pa les families.
Ye importante señalar que, cuando’l Montepío naz como Mutualidá, la entidá cuenta con más de 30.000 mineros n’Asturies (más de 60.000 venceyaos al réxime especial de la Minería). Güei, tres décades d’una fuertísima reconversión industrial, nel ocasu d’esta actividá que forxó mientres dos sieglos la historia industrial, económica y social d’Asturies, con comarques carboneres mui avieyaes, que perdieron muncha población y onde les necesidaes d’incentivu y acción social son mui importantes y bien distintes de les de los tiempos d’esplendor que nos dexó aquel mundu de vapor, carbón y aceru, el Montepío sigue firme col so proyectu, afayando les sos respuestes a les necesidaes nueves y dibuxando un mutualismu nuevu pal sieglu XXI.
Destinos de Sol – La Minería Apartments (Los Alcázares) The healing properties of the Mar Menor, a salt lagoon whose baths and muds were already used during the peninsula’s Arabic period (with Al-Kasar as the original toponym of Los Alcázares), are widely known—based on principles similar to the Dead Sea, due to its high salinity. Over time, this became one of the most appreciated sun-and-health destinations among mutualists, strengthening a close bond between Asturias and this municipality in Murcia. A visible symbol of that connection is the “Marqués de Bolarque” mining locomotive at the roundabout welcoming visitors to the residential complex, one of the highlights on local cultural-tourism routes. Later, in 2003, the acquisition of the aparthotel on the Costa de Almería expanded the offer further: Destinos de Sol – La Minería Apartments (Roquetas)
Residencia de Felechosa y mutualismu nuevu
Nesti tiempu nuevu y de necesidaes nueves pa les families, una d’elles resulta prioritaria como vieya aspiración, yá presente nes primeres organizaciones de trabayadores del carbón: responder al avieyamientu de la población minero. Por ello, el Montepío impulsa a partir de 2008, col apoyu de los sindicatos mineros, un ambiciosu proyectu destináu a la construcción en Felechosa/Altu Ayer d’un complexu residencial pa l’atención de persones mayores y/o con discapacidá, llamáu a ser ún de los más avanzaos d’España, y un proyectu innovador d’apueste por una comunidá de mayores activa y abierta al mundu, que desarrolla programes interxeneracionales, y tamién, recoyendo la esperiencia del Balneariu de Ledesma (el Montepío ye collaborador de los programes de termalismu social del IMSERSO), por sistemes de salú por agua, a los que s’axunten sales pa talleres, zones polideportives p’actividaes de xerontoximnasia, güertes, zones verdes y siendes peoniles… La Residencia de Felechosa xenera más de cien emplegos directos y ye ún de los motores económicos y sociales d’Ayer y de la comarca del Caudal.
Gobiernu y estructura
El Montepío de la Minería ta rexíu por una Comisión Rexonal, elixida en Xunta Xeneral, una vez cada trés años polos sos mutualistes en función de les candidatures presentaes nel so censu abiertu y a los socios protectores. Los sos 15 representantes, xunto con un vocal independiente, escueyen detrás al presidente.
Dende xunu de 2022, el Montepío ta presidíu por Jesús Armando Fdez. Natal. Les sos 16 Xuntes Llocales nos conceyos mineros asturianos, la so sede central n’Uviéu y la so actividá nos residenciales de Felechosa, Balneariu de Ledesma (Salamanca), Roquetas de Mar (Costa d’Almería) y Los Alcázares del Mar Menor (Murcia) determinen la importante presencia de la institución nel nuestru país, dando emplegu directu a más de 220 persones y atendiendo a más de 22.000 veceros al añu (datos de 2019). El proyectu sigue fiel a les sos raigaños y, dende 2018, la so acción social y solidaria orixinal desarróllala la Fundación Obra Social Montepío, con ayudes distintes como beques, sofitu a la natalidá y a nuevos matrimonios o pareyes, programes de salú, interxeneracionalidá, collaboraciones con entidaes, termalismu social y programes d’investigación sobre la memoria minera, conformando un programa qu’en 2020 llegó, de manera directa o al traviés de collaboraciones, a más de 2.000 persones.
Investigación y divulgación
En 2020, coincidiendo col so 50 aniversariu, y como colofón al Proyectu d’Investigación que punxo en marcha la Fundación Obra Social Montepío cola Universidá d’Uviéu, dirixíu pol profesor d’Historia y mutualista, Luis Benito García, espublízase (Ediciones Trea) el llibru «El mutualismo minero en la Asturias contemporánea». Nos últimos, y al traviés de les sos canals diferentes en Redes Sociales y web, el Montepío amuesa un compromisu divulgador de la memoria y el pasáu de la familia minera, poniendo valor a la so historia.
Tamién, al traviés del so emblemáticu Calendariu/Almanaque, desendolca acciones socioculturales, como Mujeres mineras: la historia del carbón en femenino plural, o Guajes Mineros, una historia de infancias truncadas, que dan lluz a esposiciones y charres. Esta última, a la que se suma UNICEF, pola denuncia de les condiciones de munchos neños y neñes esplotaos en mines d’África y América, principalmente, llega tovía a ser destacada pola Organización Internacional de Trabajo OIT.
Otros temes del calendariu incluyeron Categorías Profesionales Mineras (2023), pa preservar el conocimientu y difundir los oficios diferentes dientro de la mina; Los Ángeles de la Familia Minera (profesiones distintes de la minería que curiaron de les comunidaes mineres —dende la sanidá hasta les brigaes de rescate, economatos, vacaciones y campamentos—); y Otras Minerías, dedicáu a actividaes mineres distintes del carbón, en rellación con Asturies o al traviés de convenios de difusión d’ámbitu nacional. Anguaño, más de 50 organizaciones y entidaes sociales tienen alcuerdos de collaboración col Montepío.
Pueden consultar nesta mesma web los calendarios del Montepío de los últimos años (PDF) pa conocer meyor los sos proyectos sociales y el so llabor de divulgación del patrimoniu y la cultura minera 👉🏼 Archivu de Calendarios.
En 2026, el Montepío dedicó’l so emblemáticu calendariu a “El Patrimoniu de los Valores”, poniendo’l focu nos valores humanos qu’heredemos de los raigaños de llucha, dignidá y resiliencia de les families mineres: solidaridá, compañerismu, perseverancia y cuidáu de los demás. Fecha en collaboración cola Escuela d’Arte d’Uviéu y colos sos estudiantes mozos y artistes emerxentes, esta edición busca inspirar, en tiempos difíciles, la construcción d’un mundu meyor, más xustu y más humanu. Anguaño, más de 50 organizaciones o entidaes sociales tienen conveniu de collaboración col Montepío.
Reconocimientos y distinciones
El Balneariu de Ledesma ye una de les estaciones termales pioneres de la península pola so antigüedá, pero tamién ufierta programes de prevención pa la salú al traviés d’hidroterapies que son referentes del Programa de Termalismu Social del IMSERSO dende l‘orixe. La Residencia de Mayores SPA de Felechosa recibió tamién dellos reconocimientos, especialmente polos sos programes interxeneracionales, como los Premios Nacionales Súper Cuidadores o los reconocimientos de la Fundación Pilares nel so «Manual de Buenas Prácticas», na atención a persones nel campu social y sociosanitariu. El Montepío foi premiáu tamién pola Asociación Premios Ciudadanos na so XX edición de 2016, en Madrid, al conceder el so gallardón a la “Solidaridad” al Montepío y Mutualidad pol “papel históricu fechu pola entidá n’Asturies y el so llabor social y solidariu, sosteníu mientres décades y renováu nel sieglu XXI con un plan social nuevu qu’aborda, dende un enfoque cooperativu, programes qu’apuesten pola convivencia interxeneracional o los programes educativos y de prevención de salú”.
Más de recién, foi reconocíu tamién pola so trayectoria histórica col XX Premiu de la Fundación Emilio Barbón, en 2023.
La historia de solidaridá d’aquellos mineros que güei recordamos en semeyes descoloríes sigue, porque —como rezaba’l lema del Montepío— tenemos un gran heriedu que mantener vivu. Y güei más que nunca, sumando a xeneraciones nueves baxo’l lema #AlmaMinera⚒️
